संगमनेर – विधानसभा निवडणुकीचा बिगुल वाजल्यानंतर संगमनेर मतदारसंघात थोरात विरुद्ध विखे असा थरारक सामना होईल अशी अपेक्षा होती. मात्र, महाविकास आघाडीचे काँग्रेसचे दिग्गज नेते आणि विद्यमान आमदार बाळासाहेब थोरात यांच्या विरोधात महायुतीने पूर्वी भाजपचे आणि आता शिवसेना शिंदे गटाचे असलेले अमोल खताळ यांना उमेदवारी दिली. या निवडणुकीत मुख्य सामना या दोघांमध्ये होणार असला तरी थोरातांचे पारडे अधिक मजबूत मानले जात आहे.
संगमनेर मतदारसंघात सलग आठ वेळा आमदार राहिलेले बाळासाहेब थोरात यंदा नवव्यांदा निवडणूक लढवत आहेत. सहकार, शिक्षण, आरोग्य आणि सांस्कृतिक क्षेत्रात त्यांनी भरीव कामगिरी केली आहे, ज्यामुळे त्यांच्या बाजूला वजन आहे. दुसरीकडे, विरोधी उमेदवार अमोल खताळ यांना महायुतीचे पाठबळ आणि महसूल व पालकमंत्री राधाकृष्ण विखे पाटील यांचे समर्थन मिळाले आहे.
अर्ज दाखल होण्यापूर्वीच दोन्ही दिग्गज नेत्यांनी एकमेकांवर आरोप-प्रत्यारोप सुरू केले आहेत. ते एकमेकांच्या मतदारसंघात जाऊन टीका करत आहेत, ज्यामुळे संगमनेरात थोरात-विखे संघर्षाचा रंगतदार सामना पाहायला मिळणार आहे. मात्र, महायुतीकडून थोरातांना पराभूत करण्यासाठी विखेंना विशेष मेहनत घ्यावी लागणार आहे.
यापूर्वी दक्षिण नगर लोकसभा मतदारसंघात डॉ. सुजय विखे पाटील यांच्या पराभवात बाळासाहेब थोरात यांची महत्त्वाची भूमिका होती. यामुळे विखे कुटुंब आणि त्यांचे समर्थक यावेळी अधिक आक्रमक झालेले दिसत आहेत.
तरीसुद्धा काँग्रेसचे अनुभवी नेते बाळासाहेब थोरात यांचा पराभव सोपे काम नाही. निवडणूक प्रचारात दोन्ही बाजूंनी मतदारांना दिल्या जाणाऱ्या आश्वासनांवरच आता सर्वकाही अवलंबून आहे. निकालानंतरच मतदारांनी नेमके कोणाच्या बाजूने कौल दिला हे स्पष्ट होईल.
संगमनेर विधानसभा मतदारसंघात एकूण तेरा उमेदवार निवडणूक रिंगणात आहेत. मात्र, मुख्य सामना महाविकास आघाडीचे बाळासाहेब थोरात आणि महायुतीचे अमोल खताळ यांच्यात होणार आहे. तसेच उर्वरित अकरा उमेदवार किती मते घेतात, हेही या निवडणुकीत निर्णायक ठरू शकते.
Leave a Reply